Hapja e Ekspozitës „Kosova në Arkivin e Shtetit Shqiptar“
Sot, më 17.2.2020, për nder të 12 Vjetorit të Shpalljes së Pavarësisë së Kosovës, u hap Ekspozita „Kosova në Arkivin e Shtetit Shqiptar“. Ideator dhe organizator të kësaj ekspozite ishin dy institucionet simotra, pra dy arkivat shqiptare, Agjencia Shtetërore e Arkivave të Kosovës dhe Drejtoria e Përgjithshme e Arkivave të Shqipërisë, të cilat edhe kësaj here dëshmuan përkushtimin maksimal dhe bashkëpunimin e mirëfilltë në shpalosjen e fakteve historike të dy vendeve tona. Me këtë rast, folën Kryeshefi i ASHAK-së z. Bedri Zyberaj, i cili falënderoi të gjithë të pranishmit për përkrahjen dhe interesimin e tyre. Të pranishmit nga DPA e Shqipërisë i përshëndeti znj. Elsa Saka, si dhe nga Muzeu i Kosovës foli drejtori i Muzeut z, Ajet Leci. Kjo ekspozitë është edhe një sukses i radhës i një bashkëpunimi të mirëfilltë dhe vëllazëror. Hapja e kësaj ekspozite u bë e mundur edhe falë përkrahjes dhe bashkëpunimit të Muzeut Kombëtar të Kosovës, të cilët ofruan hapsirën e tyre, pra Lapidariumin për këtë eveniment. Ekspozita në vete paraqet një shekull veprimi të shqiptarëve të të dyja vendeve tona për liri dhe pavarësi. Në hapjen e ekspozitës të pranishëm ishin delegacioni nga DPA e Shqipërisë dhe shumë personalitete të njohura, të cilët kanë dhënë kontributin e tyre në zhvillimin e arkivave si institucione, pa të cilat është e pamundur të dëshmojmë të kaluarën historike të vendit.
Pra, sot përsëri u dëshmua roli dhe rëndësia e arkivave në shpalosjen e fakteve domethënëse të një shteti.
Ekspozita do të jetë e hapur për vizitorët deri më 21.2.2020 (e premte).