HAPJA E KËNDIT ARKIVOR NË AGJENCINË SHTETËRORE TË ARKIVAVE TË KOSOVËS
Më 23 nëntor 2020, në ambientet e AShAK-së në Prishtinë, u hap këndi arkivor i DPA-së dhe me këtë aktivitet arkivat edhe njëherë dëshmuan se asnjëherë nuk mungon përkrahja dhe bashkëpunimi në të mirë të kombit. Ky aktivitet u realizua falë bashkëpunimit të mirëfilltë në mes të Agjencisë Shtetërore të Arkivave të Kosovës dhe Drejtorisë së Përgjithshme të Arkivave të Shqipërisë.
Kryeshefi Ekzekutiv i AShAK-së z. Bedri Zyberaj u shpreh se inaugurimi dhe hapja e këndit arkivor të DPA-së këtu në Prishtinë është e një rëndësie të veçantë për çdo qytetarë të Republikës së Kosovës. Po ashtu, edhe Drejtori i DPA-së z. Ardit Bido u shpreh i lumtur me jetësimin e këtij projekti të përbashkët, i cili ka një rëndësi të madhe për të dy arkivat.
Dy krerët e institucioneve potencuan se qëllimi i hapjes së këndit arkivor është që të nxit hulumtimin e qytetarëve në arkiva dhe t’ua lehtësojë punën studiuesve që të hulumtojnë dokumente arkivore, të cilat gjenden në arkivin e shtetit shqiptar, pa qenë nevoja të udhëtojnë drejt Tiranës. Z. Bido premtoi që edhe pse nga distanca, ky shërbim do të ofrohet me të njëjtat rregulla, procedura dhe me të njëjtën formë e shpejtësi sikurse në sallën e studimit në DPA të Shqipërisë. Krerët e institucioneve u zotuan se në të ardhmen synojnë të hapin këndin arkivor edhe në qytetet dhe vendet tjera anembanë ku ka shqiptarë dhe se projektet e tilla do të kenë mbështetje dhe përkrahje të pa kursyer.