KRYESHEFI EKZEKUTIV I AGJENCISË SHTETËRORE TË ARKIVAVE TË KOSOVËS PRITI NË TAKIM AMBASADORIN E REPUBLIKËS SË SHQIPËRISË NË KOSOVË z. QEMAL MINXHOZI
Më 9.2.2021, Agjencinë Shtetërore të Arkivave të Kosovës e vizitoi Ambasadori i Republikës së Shqipërisë në Kosovë z. Qemal Minxhozi, i cili në takim u prit nga Kryeshefi Ekzekutiv, z. Bedri Zyberaj.
Kryeshefi Ekzekutiv z. Bedri Zyberaj e njoftoi mysafirin me kushtet dhe gjendjen aktuale të Agjencisë Shtetërore të Arkivave të Kosovës, duke e informuar rreth thesarit dokumentar që ruan ASHAK-ja, si dhe rreth mungesës së kushteve infrastrukturore dhe problemeve me të cilat ballafaqohet ky institucion.
Një vëmendje e veçantë iu kushtua mungesës së objekteve dhe kushteve për Arkivat Ndërkomunale të cilat veprojnë në kuadër të AShAK-së. Po ashtu, z. Zyberaj prezantoi edhe aktivitetet e realizuara fal marrëveshjeve të bashkëpunimit me arkivat e rajonit, duke veçuar bashkëpunimin me Drejtorinë e Përgjithshme të Arkivave të Shqipërisë, i cili nuk është vetëm bashkëpunim profesional, por edhe vëllazëror, me ç’rast njoftoi edhe për aktivitetet e përbashkëta të realizuara mes këtyre dy institicioneve, si hapja e Këndit Arkivor të DPA-së në Sallën e leximit të AShAK-së, hapja e ekspozitave të përbashkëta dhe organizimi i Konferencës së përbashkët Mbarëkombëtare të Arkivistikëë, etj.
Ambasadori Z. Minxhozi shprehu falënderim për pritjen e tij, ku ndër të tjera theksoi se ishte nder dhe kënaqësi për të vizituar një institucion të rëndësisë së veçantë siç është AShAK dhe shprehu gatishmërinë për një bashkëpunim më intensiv në të ardhmen.
Ambasadori z. Minxhozi u zotua se do të ofrojë përkrahjen maksimale për ASHAK-në duke u angazhuar dhe në cilësinë e Dekanit të trupit diplomatik të akredituar në Republikën e Kosovës detyrë shtesë që e ka tani. Me atë rast ai shprehu bindjen e plotës se një angazhim i tillë do të ketë rezultatet të prekshme në të ardhmen e afërt.