KONGRESI NDËRKOMBËTAR I ARKIVAVE \
Kongresi Ndërkombëtar i Arkivave, që mbahet çdo katër vjet, këtë vit është duke u mbajtur në Seul të Koresë Jugore nga 5-10 shtator. Është një eveniment i veçantë ndërkombëtar për arkivat dhe menaxhimin e dokumenteve e shënimeve në mbarë botën. Kongresi organizohet nga Këshilli Ndërkombëtar i Arkivave, që është Organizata më e lartë ndërkombëtare për arkiva.
Kosova, që nga viti 2004 është anëtare e Këshillit Ndërkombëtar të Arkivave në kategorinë A, kategori e cila përfshinë Arkivat Nacionale, pra Kosova është me të drejta të barabarta sikurse edhe 199 shtetet tjera anëtare, dhe këtë vit në këtë ngjarje të madhe ndërkombëtare për arkiva vendi ynë përfaqësohet nga z. Ramë Manaj, Kryeshefi Ekzekutiv i Agjencisë Shtetërore të Arkivave të Kosovës dhe znj. Shpresa Mekaj, Drejtoreshë e Departamentit për Politika Zhvillimore të këtij institucioni.
Me rreth 1600 anëtarë nga 199 vende, etika e Këshillit është shfrytëzimi i diversitetit kulturor të anëtarëve të saj për të ofruar zgjidhje profesionale të efektshme dhe fleksibile. Tema kryesore e këtij viti është "Arkivat, Harmonia dhe Miqësia: Sigurimi i ndjeshmërisë kulturore, drejtësisë dhe bashkëpunimit në një botë të globalizuar". Sesionet e Kongresit do të shqyrtojnë temat që ndërlidhen me ruajtjen e të dhënave në epokën digjitale, bashkëpunimin arkivor, përdorimin e të dhënave dhe arkivave në sistemin e drejtësisë, harmoninë në mes të kulturave dhe shoqërive arkivore, etj.