KRYESHHEFI EKZEKUTIV I AGJENCISË SHTETËRORE TË ARKIVAVE TË KOSOVËS Z. BEDRI ZYBERAJ PRITI NË TAKIM AMBASADORIN E MBRETËRISË SË NORVEGJISË NË KOSOVË z. JENS ERIK GRONDAHL, MINISTRIN E MBROJTJES Z. ARMEND MEHAJ DHE DEPUTETIN E KUVENDIT TË KOSOVËS Z. ENVER DUGOLLI
E hënë, 7 qershor 2021
Kryeshefi Ekzekutiv i Agjencisë Shtetërore të Arkivave të Kosovës z. Bedri Zyberaj priti në takim zyrtar Ambasadorin e Mbretërisë së Norvegjisë në Kosovë z. Jens Erik Grondahl, ministrin e Mbrojtjes z. Armend Mehajn dhe deputetin e Kuvendit të Kosovës z. Enver Dugolli.
Z. Zyberaj shprehu mirënjohje për takimin dhe me këtë rast i njoftoi mysafirët me të arriturat e deritashme të AShAK-së, ku foli për natyrën e punës, kushtet dhe gjendjen aktuale të Agjencisë Shtetërore të Arkivave të Kosovës, si dhe i informoi për lashtësinë dhe sasinë e thesarit arkivor që ruan AShAK-ja.
Për më tepër, ai vuri theksin te digjitalizimi si domosdoshmëri e kohës, proces që AShAK-ja e ka të pamundur ta bëjë për shkak të mungesës së buxhetit.
,,Po e theksoj këtë sepse vendi që përfaqësoni ju shkëlqesi ka dhënë një ndihmë të madhe për Kosovën në të kaluarën e afërt dhe kur bëhet fjalë për digjitalizimin është po ashtu vendi që i kushton rëndësi dhe i dedikon investime të shumta këtij procesi” – tha ndër të tjera z. Zyberaj
Ambasadori i Mbretërisë së Norvegjisë z. Jens Erik Grondahl shprehu falënderim për pritjen e tij, dhe takimin e sotëm e vlerësoi shumë. Ambasadori u pajtua plotësisht me atë që tha z. Zyberaj për digjitalizimin dhe shprehu gatishmërinë që pas këtij takimi do të shikojë se cilat do të jenë ndihmat e vendit të tij për Arkivin e Kosovës. Ai u zotua që fillimisht do të shikojë mundësinë që AShAK-së t’ia ofrojë eksperiencat e arkivave të vendeve të tij e pastaj dhe format tjera që do të mund konstatohen nga bashkëpunimi ynë në të ardhmen.
Përpos takimit formal, Shkëlqesia e tij z. Jens Erik Grondahl vizitoi dhe i pa së afërmi disa mjedise të punës në AShAK, si: Vendruajtjen, Laboratorin e digjitalizimit, Laboratorin e restaurimit-konservimit, Sallën e hulumtimit së bashku me Këndin Arkivor të Drejtorisë së Përgjithshme të Arkivave - Shqipëri dhe bibliotekën.
Ministri Mehaj u largua më herët për shkak të një takimi që kishte sipas agjendës paraprake.