Pjesemarrje ne akademine perkujtimore "Malli per Rugoven' ne Suedi

Më datë 18-20.01.2019, Kryeshefi Ekzekutiv i Agjencisë Shtetërore të Arkivave të Kosovës z. Ramë Manaj, me Ftesë të Shoqatës së shkrimtarëve dhe krijuesve shqiptarë “Papa Klementi i XI Albani” në Angelholm të Suedisë, morri pjesë në akademinë përkujtimore të titulluar “Malli për Rugovën”, kushtuar figurës së Presidentit historik Dr. Ibrahim Rugova, si dhe manifestimin “Dita e Plisit”.
E gjithë kjo u organizua nga Shoqata e shkrimtarëve dhe krijuesve shqiptarë “Papa Klementi i XI Albani” në Suedi në bashkëpunim me Lidhjen Demokratike të Kosovës- dega në Suedi dhe Shoqatën Kulturore “Nënë Tereza” në Angelholm të Suedisë.
Gjatë këtij evenimenti përveç fjalimit përshëndetës të kryetarit të SHKSH “Nënë Tereza ” dhe drejtuesve Saranda Iseni dhe Osman Ahmetgjekaj, për Presidentin Rugova folën edhe Ramë Manaj-Kryeshef Ekzekutiv i ASHAK-së, Qibrije Hoxha- Kryetare e Degës së LDK-së në Suedi dhe Hysen Ibrahimi. Organizatorët e këtij manifestimi z. Ramë Manaj e prezantuan si një veprimtar të devotshëm të LDK-së dhe bashkëpunëtor të ngushtë të të ndjerit Ibrahim Rugova.
Në këtë event u përuruan edhe disa libra të krijuesve shqiptarë si dhe dy leksikone të rëndësishme për mërgatën shqiptare që jeton e punon në Suedi. Në fund u mbajt edhe një orë letrare, ku poezitë e lexuara kryesisht iu kushtuan Dr. Ibrahim Rugovës, plisit dhe mikut më të madh të shqiptarëve Ulmar Qvick.