U hap Ekspozitë me rastin e 7 Marsit- Ditës së Mësuesit
Agjencia Shtetërore e Arkivave të Kosovës me rastin e 7 Marsit –Ditës së Mësuesit, në kuadër të veprimtarisë së vet hapi Ekspozitën “Arsimi shqiptar nëpër dokumente arkivore”, në Hollin e Bibliotekës Kombëtare “Pjetër Bogdani” në Prishtinë. Me një Fjalim përshëndetës dhe gjithëpërfshirës Ekspozitën e hapi Kryeshefi Ekzekutiv i ASHAK-së z. Ramë Manaj, i cili Ekspozitën në fjalë e paraqet si një thesar shumë të çmuar - dokumente që flasin e rrëfejnë shumë. Megjithatë, potencoi se vlerësimin më adekuat gjithmonë do ta japin vizitorët e Ekspozitës.
Duhet theksuar se në Ekspozitë u përfshinë dokumente të cilat ruhen në fondet arkivore të ASHAK-së, duke filluar nga Preambula e Shkollës Katolike në Pejë, evidencat me emrat e djemve dhe vajzave të cilët kanë vijuar mësimin në Shkollën Katolike në Prizren, orari i mësimit, lëndët mësimore, procesverbalet e inspektimeve nga Mbretnija Shqiptare, fotografi të mësuesve me nxënës, shkollave etj.
Ekspozita u vizitua nga qytetar të ndryshëm, studentë të fakulteteve, etj., të cilët shprehën hapur entuziazmin e tyre lidhur me dokumentet të cilat u paraqitën në këtë Ekspozitë.
Ekspozita ishte e hapur më datat 7-8 Mars 2017 në Bibliotekën Kombëtare dhe më data 9-10 Mars 2017 në Hollin e Agjencisë Shtetërore të Arkivave të Kosovës.