VIZITË ZYRTARE NË DREJTORINË E PËRGJITHSHME TË ARKIVAVE TË SHQIPËRISË

Delegacioni nga ASHAK-u i kryesuar nga Kryeshefi Ekzekutiv i ASHAK-së z. Ramë Manaj, znj. Shpresa Mekaj, Drejtoresha e DPZH-së dhe z. Skender Beqiri, Drejtor i ANK-Prishtinë,  më datë  29.03.2017, realizuan një vizitë zyrtare në Drejtorinë e Përgjithshme të Arkivave të Shqipërisë.  

Qëllimi i vizitës ishte diskutimi rreth detajeve lidhur me Konferencën “Arkivat dhe puna arkivore në trevat e shqiptarëve në shek. XX – XXI”, në organizim të Drejtorisë së Përgjithshme të Arkivave të Shqipërisë dhe Agjencisë Shtetërore të Arkivave të Kosovës.

Krerët e dy institucioneve arkivore u dakorduan që Konferenca do të mbahet më 12 Maj në sallën e Muzeut në Tiranë, ndërsa 2 muaj pas konferencës do të nxirret botimi i përbashkët me kumtesat e paraqitura në  konferencë.  

Gjithashtu u arrit marrëveshja që të organizohet një Konferencë e përbashkët mes ASHAK dhe DPA,  iniciativë e filluar nga z. Rame Manaj dhe znj. Vlatka Lemic gjatë Konferencës “3-ditët e ICARUS-it” mbajtur në Kroaci prej 16-18 mars 2017. 

Qëllim tjetër i kësaj vizite ishte edhe marrja e përvojës për normat e punës, pasi që Agjencia Shtetërore e Arkivave të Kosovës në kuadër të planit të punës këtë vit ka ngritur Komisionin për rishqyrtimin dhe azhurnim e Rregullores për normat e punës. Komisioni do të marrë për bazë edhe përvojat nga DPA dhe Arkivi Shtetëror i Maqedonisë.