MË 21.04. 2017, AGJENCINË SHTETËRORE TË ARKIVAVE TË KOSOVËS E VIZITOI MINISTRI I KULTURËS, RINISË DHE SPORTIT Z. KUJTIM SHALA
MË 21.04. 2017, AGJENCINË SHTETËRORE TË ARKIVAVE TË KOSOVËS E VIZITOI MINISTRI I KULTURËS, RINISË DHE SPORTIT Z. KUJTIM SHALA
Më datë 21.04.2017 Agjencinë Shtetërore të Arkivave të Kosovës e vizitoi Ministri i Kulturës, Rinisë dhe Sportit z. Kujtim Shala, ku u prit nga Kryeshefi Ekzekutiv i këtij institucionit z. Ramë Manaj.
Fillimisht z. Ramë Manaj e informoi Ministrin për kushtet dhe gjendjen aktuale në ASHAK, duke filluar me informatat rreth asaj se çka posedon ASHAK-ja, ku theksoi se posedojmë 7938.78 metra gjatësi lineare të lëndës arkivore dhe 1310 fonde.
Po ashtu, Ministri u njoftua se objekti i ASHAK-së është ndërtuar qysh në vitin 1974 dhe që atëherë nuk është bërë ndonjë renovim, dhe në këtë objekt përveç ASHAK-së janë të vendosura edhe dy institucione të tjera, të cilat krijojnë vështirësi sa i përket hapësirës, me ç’rast menaxhmenti i ASHAK-së është i obliguar që punëtorët e vet ti sistemojë nga 3-4 vetë në një zyre gjë që e vështirëson shumë punën dhe në të njëjtën kohë rrezikon shëndetin e punëtorëve, pasi që lënda është e vjetër dhe e pluhurosur. Për shkak të mbingarkesës së shkaktuar nga dy institucionet tjera problem është edhe mungesa e sallave për punë ekipore dhe për mbajtjen e Trajnimeve, Seminareve, etj.
Z. Manaj theks të veçantë i kushtoi mungesës së kushteve në Depo dhe problemeve me të cilat ballafaqohen siç janë: sasia e madhe e lëndës arkivore të parregulluar si pasojë e numrit të vogël të arkivistëve; mungesa e klimatizimit,; mungesa e aparaturës që siguron lagështinë konstante; mungesa e rafteve, dritaret e vjetruara; sistemi i vjetruar elektrik; mungesa e sistemit përkatës për mbrojtjen kundër zjarrit, e cila mund të shkaktojë katastrofë.
Kryeshefi Ekzekutiv i ASHAK-së z. Ramë Manaj theksoi se shpreson që Qeveria e Kosovës do të rrisë interesimin dhe pret nga ministri Shala që ta përkrah këtë institucion në përmirësimin e gjendjes me të cilën përballemi, e sidomos në sigurimin e sistemit përkatës për mbrojtje kundër zjarrit, i cili është më se i domosdoshëm.
Ndërsa, Ministri Shala u shpreh se do të bëj përpjekje që Agjencia Shtetërore e Arkivave të Kosovës të marrë tretmanin meritor për shkak të rolit dhe rëndësisë së posaçme që ka, duke u organizuar një takim të përbashkët edhe me Kryeministrin e Republikës së Kosovës z. Isa Mustafa edhe me Ministrin e Administratës Publike z. Mahir Yagcilar.